Partia e Ali Ahmetit- BDI, e ka quajtur si një tentativë të dështuar revoltën e banorëve të Kumanovës, të cilët sot bllokuan rrugën në tentim për të mos lejuar futjen e Ahmetit dhe anëtarëve tjerë të partisë në Kumanovë. Në një deklaratë për mediat thuhet se “BDI dënon ashpër aktet e paligjshme ndaj karavanit të delegacionit”
“Ne shprehim keqardhje për përdorimin e turpshëm të dhimbjes së njerëzve nga disa grupe të reja politike të cilat duan të afirmohen nëpërmjet akteve të dëshpëruara. BDI dënon çdo mjet politik jopaqësor dhe mbetet e vendosur të vazhdojë rrugën e vetë politike me anë të bisedave me qytetarët.”, thuhet në reagimin e BDI-së.
Në takimin me Kumanovarët, thuhet më tej në komunikatë, Ali Ahmeti shprehu mirënjohje për mbështetjen e treguar ndaj tij dhe BDI-së dhe tha se së bashku ishin më të fortë sesa keqbërësit.
“Keqbërësit në Kumanovë kurrë nuk do të gjejnë aleatin te Bashkimi Demokratik për Integrim,” u shpreh Ali Ahmeti.
