Kryetari i Kuvendit të Serbisë, Ivica Daçiq, deklaroi sot se shfaqja e flamurit kombëtar në parlamentin serb është një “provokim i qëllimshëm” i deputetit Shaip Kamberi me qëllim që të vërehet në publik.
“Më vjen mirë që Kamberi vendosi edhe flamurin e Serbisë, sepse ai rrallë e bën atë. Por, në një farë mënyre, kjo është një “uverturë” për Ditën e Flamurit Shqiptar, të cilën të gjithë do ta tregojnë, nga Maqedonia e veriut në Mal të Zi – tha Daçiq.
Ai deklaroi se ka pak deputetë të opozitës në legjislaturën aktuale dhe se Kamberi është në një farë mënyre udhëheqësi i opozitës në parlament, të cilin, siç thotë ai, e përdor në mënyrë që secili prej veprimeve të tij të jetë “relativisht provokues” në mënyrë që të regjistrohet në publik.
Daçiq tha se deri më tani ai është përpjekur të jetë tolerant dhe efikas në kryerjen e seancave parlamentare dhe se ai nuk dha asnjë paralajmërim deri dje, por ai thekson se deputeti nga Bujanovci “ekzagjeroi” këtë herë.
“Unë nuk kam asnjë tolerancë kur shkelet rregulli i procedurës dhe rendi bazë në parlament, në të cilin nuk lejohen të valëviten flamuj të partive dhe flamuj të vendeve të huaja”, potencoi ai.
Siç tha Daçiq legjislacioni që përshkruan se cilët flamuj mund të përdoren nga pakicat kombëtare është një çështje krejtësisht e ndryshme. “Nëse dikush ka një problem me këtë, le të kërkojë ndryshime në ato ligje, dhe jo të provokojë kështu”.
Të enjten, deputeti Shaip Kamberi kërkoi ndryshime në Ligjin për të Drejtat dhe Liritë e Pakicave Kombëtare, dhe vendosi flamurin e Shqipërisë në ulësen parlamentare para tij, por me insistimin e kreut të Kuvendit të Serbisë, ai e hoqi.
Video:
