Në 57 faqe aktgjykim, Gjykata e Apelit ka arsyetuar mënyrën se si ka arritur të provojë se Sami Lushtaku nuk ka kryer vrasje siç pretendonte Dëshmitari D, e po ashtu të vërtetojë përgjegjësinë e tij komanduese, duke e dënuar me 7 vjet burgim.
Portali KALLXO.com ka siguruar një kopje të vendimit të Gjykatës ku përshkruhet në detaje mënyra se si Gjykata e vlerësoi çështjen “Drenica 1”.
Siç shkruhet në aktgjykim, në shkallën e parë Lushtaku ishte dënuar për vrasjen e një personi, i cili nuk ishte identifikuar. Mbrojtja e Lushtakut kishte kundërshtuar këtë dënim duke pretenduar se nuk mund të dënohet dikush nëse nuk dihet viktima.
Apeli ka konstatuar se një person mund të dënohet nëse nuk është gjetur viktima dhe nuk është identifikuar mirëpo dëshmia e Dëshmitarit D nuk e ka bindur Apelin që ta bëjë fajtor Sami Lushtakun për vrasjen.
“Kur e lexojmë me vëmendje del se deklarata e tij është e mjegulluar dhe e paqartë”, shkruhet në vendimin e Apelit.
