Përfshirja e faktorit shqiptar në bisedimet për emrin janë njëra nga kushtet kyçe për formimin e Qeverisë së re. Në pikën e pestë të Platformës së përbashkët, BDI, Besa, dhe Aleanca për Shqiptarët kërkojnë miratimin e një rezolute në Kuvend me të cilën do të obligohet Qeveria në mënyrë aktive të zgjedh kontekstin me emrin, përcjell Telegrafi Maqedoni.
Megjithatë askund në dokument nuk është theksuar me çfarë pozicione do të hyjnë partitë shqiptare në ekipin për bisedime dhe a do të përkrahin ndryshimin e gjuhës dhe identitetit maqedonas. TV21 kërkoi përgjigje nga partitë politike shqiptare, kurse e para që doli me përgjigje ishte Lëvizja Besa për cilën është e papranueshme gjuha dhe identiteti maqedonas të jenë temë bisedimesh me Greqinë. Sipas tyre, qëndrimi në lidhje me emrin duhet të ndërtohet së bashku me të gjitha bashkësitë etnike në Maqedoni.
“Në kërkojmë dhe i përkrahim maqedonasit në identitetin dhe gjuhen e tyre si gjuhë në vete dhe jo vetëm maqedonasit dhe identitetin e tyre por edhe identitetin dhe gjuhën e të gjitha bashkësive etnike që jetojnë në Maqedoni. Këtu do të jemi të pacenueshëm dhe në asnjë mënyrë nuk do të pranojmë të jenë temë për bisedime. Ajo që kërkojmë ne është identiteti shtetëror të mos jetë i njëjti me identitetin etnik të asnjë bashkësie etnike”, thonë nga Lëvizja BESA.
Përgjigje morëm edhe nga Bashkimi Demokratik për Integrim. Sipas tyre, hyrja në NATO dhe Bashkimin Evropian mund vetëm të forcojë më shumë identitetin e maqedonasve.
“Ne mendojmë se propozimet e ndërmjetësuesit nuk do të prekin identitetin e bashkësisë etnike maqedonase, por të kundërtën hyrja në NATO dhe sigurimi i një stabiliteti afatgjatë dhe ardhmëri vetëm se do të forcojë identitetin e tyre”, thonë nga BDI.
Aleanca për Shqiptarët deri në këtë moment nuk është prononcuar në lidhje me atë se a janë “pro” apo “kundër” ndryshimit të identitetit dhe gjuhës maqedone. Ata nuk zbulojnë asgjë më shumë nga ajo që është thënë në pikën 5 nga Platforma e përbashkët.
“Mbesim në atë që është shkruar në dokument, ose në miratimin e një Rezolute të përbashkët dhe obligative në Kuvendin e Republikës së Maqedonisë me të cilën Qeveria do të obligohen në mënyrë aktive të kyçet në zgjedhjen e kontekstit të emrit. Në të njëjtën kohë kërkojmë përfshirje të Shqiptarëve në grupin punues për bisedime direkte me Greqinë”, thonë nga Aleanca për Shqiptarët.
Tema për përfshirjen e faktorit shqiptar në Maqedoni në procesin e bisedimeve me Greqinë nuk është gjë e re. Bashkimi Demokratik për Integrim këtë çështje e ka plasuar qysh në vitin 2007 kur është kërkuar politikanët shqiptar të përfshihen në bisedimet për kontestin me emrin që të ndihmojnë në gjetjen e një zgjidhje për Maqedoninë.
Gazetat greke tanimë një periudhë të gjatë shkruajnë se ndërmjetësuesi Nimic pret që Qeveria e re në Maqedoni të jetë bashkëbisedues i fortë në kontekstin për emrin. Në ndërkohë Cipras thotë se Greqia nuk do të heqë dorë nga linjat tyre të kuqe edhe krahas masave për ndërtim të besimit. Sipas tij, është e mundur marrëveshje vetëm nëse pranohet një emër i zgjeruar me përcaktim gjeografik./Telegrafi/
