Deputetja e Alternativës Safije Sadiki Shahini ka reaguar pas akuzave të Arbër Ademit se opozita është fajtore për mosmiratimin e Ligjit për Lojërat e Fatit. Ajo thotë se dështimi i këtij ligji tregon qartë se qeveria aktuale nuk ka shumicë, ndërsa paralajmëron shumicë të re pas zgjedhjeve parlamentare të 8 majit.
“Arbër Ademi, si duket i dëshpëruar që nuk do i ecë zari në lojërat e kazinove, ka nisur të ketë problem edhe me numrat.
Gjithë ditën e lume pohon se shumica i ka 64 deputetë, e pastaj qahet se opozita nuk ia mbështet ligjin e kazinove.
Ne e dimë se tashmë e kanë makth koalicionin VLEN, andaj edhe kur bie shi duan ta fajësojnë, por për këtë nuk mund t’u ndihmojmë.
Mbasi fajin e ka opozita që ata nuk kanë shumicë, kjo është shenjë se afati i tyre ka skaduar. Në maj vjen shumica e re”, shkruan deputetja Sadiki Shahini.
