Kancelari gjerman Olaf Scholz, në një bisedë me presidentin iranian Massoud Pezeshkian, tha se ishte shumë i shqetësuar për rrezikun e një “zjarri rajonal në Lindjen e Mesme”.
Në njoftimin për shtyp të kancelares gjermane thuhet se Scholz ka pasur një bisedë telefonike me presidentin iranian.
Sipas deklaratës, Scholz “i bëri thirrje presidentit që të bëjë gjithçka që është e mundur për të parandaluar përshkallëzimin e mëtejshëm ushtarak” dhe tha se “spiralja e dhunës në Lindjen e Mesme tani duhet të ndalet”.
Kancelarja gjermane është një nga shumë liderë ndërkombëtarë që duan të parandalojnë përshkallëzimin e tensioneve midis Iranit dhe Izraelit.
Shqetësimet për një konflikt më të gjerë në Lindjen e Mesme janë shtuar që kur lideri i organizatës palestineze Hamas, të cilën Shtetet e Bashkuara dhe Bashkimi Evropian e konsiderojnë një organizatë terroriste, u vra në Iran. Izraeli dyshohet për sulmin.
Irani dhe forcat aleate të tij në rajon kanë njoftuar se po planifikojnë sulme hakmarrëse ndaj Izraelit pas vrasjes së liderit të Hamasit dhe një prej liderëve të Hezbollahut në Liban.
Udhëheqësit e Gjermanisë, Francës dhe Britanisë më herët më 12 gusht i bënë thirrje Iranit dhe aleatëve të tij që të “përmbahen nga sulmet që do të përshkallëzojnë më tej tensionet rajonale”.
“Asnjë vend apo komb nuk do të përfitojë nga përshkallëzimi i mëtejshëm në Lindjen e Mesme”, thanë Scholz, presidenti francez Emmanuel Macron dhe kryeministri britanik Keir Starmer në një deklaratë të përbashkët.
Udhëheqësit e Francës, Gjermanisë dhe Britanisë së Madhe thanë gjithashtu se “nuk mund të ketë vonesa të mëtejshme” në bisedimet e armëpushimit në Gaza.
Deklarata e përbashkët erdhi pas një prej sulmeve më vdekjeprurëse izraelite në Rripin e Gazës të rrethuar në më shumë se 10 muaj luftë.
Izraeli tha se sulmi i së premtes në një shkollë ku strehoheshin palestinezët e zhvendosur ishte shënjestër e grupit palestinez Hamas. Autoritetet e kontrolluara nga Hamasi thanë se të paktën 93 persona u vranë në sulm.
“Lufta tani duhet të përfundojë dhe të gjithë pengjet që ende mbahen nga Hamasi duhet të lirohen”, thanë udhëheqësit në një deklaratë të përbashkët.
Izraeli nisi sulmet në Rripin e Gazës në një përpjekje për të shtypur Hamasin pasi luftëtarët e grupit islamik sulmuan Izraelin jugor më 7 tetor, duke vrarë 1200 njerëz dhe duke marrë më shumë se 250 pengje, sipas shifrave izraelite.
Që atëherë, gati 40,000 palestinezë janë vrarë në ofensivën izraelite në Rripin e Gazës, sipas Ministrisë së Shëndetësisë të Territorit Palestinez të kontrolluar nga Hamasi. / REL
