Partia e Lirisë publikoi një videon të re të arrestimit të ish-presidentit Ilir Meta.
Sekretari i Partisë së Lirisë, Tedi Blushi tha se kreu i Partisë së Lirisë u godit në kokë nga efektivët të cilët e morën me forcë nga makina me të cilën po udhëtonte.
Gjatë konferencës për mediat ai theksoi se do të bëjnë një kallëzim penal.
Ai tha se kanë arritur të identifikojnë dy nga efektivët e Policisë së Shtetit, të cilët ditën e djeshme tërhoqën me forcë nga makina ish-presidentin Ilir Meta dhe ekzekutuan vendimin për arrestimin e tij.
“Jemi ende duke bërë verifikime. Ishte një efektiv i moshës 27 vjeç, pa eksperiencë në strukturat e policisë i cili jo vetëm ka guxuar ti afrohet makinës, por edhe ka shërbyer aty si roje trafiku. Sa i takon horrave që nxorën forcërisht presidentin e Partisë së Lirisë nga automjeti pa u identifikuar se të cilës strukturë ishin, ata ishin terroristë dhe asgjë më shumë. Ne kemi evidentuar nga ata dy persona me precedentë penalë, të cilët është e paqartë se si janë bërë pjesë e policisë së shtetit, por kanë të shkuar të errët dhe lidhje me bandat e Durrësit”, tha ai.
