Udhëheqja shtetërore dhe politike e Greqisë ka risjellë në tryezën e bisedimeve thirrjen e saj për negociata me Gjermaninë në lidhje me dëmshpërblimet për dëmet e shkaktuara gjatë Luftës së Dytë Botërore.
Kërkesat e kahershme greke janë theksuar gjatë takimit të presidentes së vendit me homologun e saj gjerman të cilin e kishte ftuar për një vizitë treditore në Greqi.
“Dua të theksoj, bazuar në vendimin përkatës të Kuvendit të Greqisë në vitin 2019, rëndësinë e madhe të çështjes së reparacioneve të luftës dhe të Kredisë së Pushtimit e cila mbetet e jashtëzakonshme për popullin grek”, tha Katerina Sakellaropoulou-Presidentja e Greqisë.
Pretendimet e Greqisë, që i ka dërguar notë zyrtare Gjermanisë prej vitit 2019, kanë të bëjnë me kompensimin dhe dëmshpërblimet për dëmet që pësoi vendi, viktimat dhe pasardhësit e tyre gjatë Luftës së Dytë Botërore, me vlerë sipas Zyrës së Përgjithshme të Kontabilitetit të Greqisë prej 278,7 mld euro, si dhe shlyerjen e të ashtuquajturës Kredi e pushtimit prej gati 10 mld eurosh, kthimin e veprave të artit dhe atyre arkeologjike të grabitura nga nazistët.
“Për sa i përket qëndrimit tonë ligjor për çështjen e dëmshpërblimeve, ai ndryshon, siç e dini, ne jemi të mendimit që ligjërisht kjo çështje konsiderohet e mbyllur, por ne mbetemi të përkushtuar ndaj përgjegjësisë sonë historike”, Frank-Walter Steinmeier, Presidenti i Gjermanisë.
Steinmeier përjashtoi mundësinë e negociatave të reja të dëmshpërblimeve edhe në takimin që pati me kryeministrin grek Mitsotakis kur ky i fundit theksoi se për Greqinë çështja e dëmshpërblimeve të luftës ishte ende shumë e “gjallë”.
Ndërsa Gjermania ka kërkuar falje për krimet e epokës naziste të kryera gjatë luftës, ajo vazhdimisht ka pohuar se nuk diskuton dëmshpërblimet dhe ka mohuar t’i ketë borxh diçka Greqisë për Luftën e Dytë Botërore që kur i pagoi Athinës shumën prej 115 milionë markash gjermane në vitin 1960.
Presidenti Steinmeier mbërriti në Selanik, të martën pasdite dhe vizitoi kantierin e ndërtimit të Muzeut të Holokaustit të Greqisë, i shoqëruar nga presidentja greke Sakelaropoulou, ndërsa pas Athinës, ku vizitoi monumentin e Ushtarit të Panjohur dhe vendosi një kurorë lulesh në nderim të të rënëve të Greqisë , axhenda e tij përmban edhe vizitën e tij në fshatin Kantanos të Kretës , aty ku nazistët gjermanë vranë 180 vetë në vitin 1941.
