Zyrtarët e KSHZ-së japin detaje për procesin e rivotimit që do të bëhet të dielën më 12 nëntor, në vendvotimin 2901. Bëhet fjalë për vendvotim në kuadër të komunës së Çairit, gjegjësisht për votuesit që realizojnë të drejtën e votës në shkollën fillore “Idnina”, raporton Televizioni SHENJA.
Këtu janë 719 qytetarë që do të votojnë për zgjedhjen e kryetarit të Komunës së Çairit. Zëdhënësja e KSHZ-së, Arjeta Xhemaili sqaroi se rregullat për rivotimin në këtë vendvotim janë të njëjta si për rrethin e dytë të zgjedhjeve, duke shtuar se opinioni duhet ta ketë të qartë se nuk bëhet fjalë për rreth të tretë të zgjedhjeve, por vetëm për rivotim, pasi bëhet fjalë për vetëm një vendvotim në kuadër të një komune.
ARJETA XHEMAILI, ZËDHËNËSE E KSHZ-SË
“Procedura e rivotimit normal është si në rrethin e dytë, faktikisht partitë politike në qoftë se shprehin dëshirë mund të zhvillojnë fushatën e tyre brenda këtyre ditëve, por e dini se rivotimi do të realizohet më 12 nëntor, domethënë ditën e diel dhe po ashtu ditën e shtunë do të mbizotërojë heshtja zgjedhore. Këto janë rregullat të cilat faktikisht janë të bazuara në bazë të kodit zgjedhor dhe presim që të dyja partitë politike t’i respektojnë të njejtat”.
Xhemaili shtoi se KSHZ ka miratuar vendimin e Gjykatës Administrative për rivotim në këtë vendvotim, pasi numri i votave në këtë vendvotim ka gjasa që të ndryshojë edhe rezultatin përfundimtar të zgjedhjeve lokale dhe të përcaktojë fituesin, për shkak të numrit të madh të votuesve të regjistruar dhe dallimit të ngushtë mes dy kandidatëve që shkuan në balotazh.
ARJETA XHEMAILI, ZËDHËNËSE E KSHZ-SË
“Siç jeni të informuar, është sjellur vendim nga ana e Gjykatës Administrative, do të ketë rivotim në vendvotimin 2901 sa i përket Komunës së Çairit. Rrespektivisht rivotimi do të bëhet për arsye se i gjithë ky process në atë vendvotim ndikon po ashtu në procesin zgjedhor, respektivisht në rezultatet zgjedhore”
Dallimi mes Visar Ganiut të BDI-së dhe Zeqirja Ibrahimit të Lëvizjes BESA, pas rrethit të dytë të votimeve ishte 209 vota, ndërsa në vendvotimin 2901 ka gjithsej 719 votues të regjistruar. Prej tyre në rrethin e dytë kishin votuar vetëm 278 persona, prej të cilëve Zeqirja Ibrahimi kishte fituar 164 vota, Visar Ganiu 98 dhe 17 vota kanë qenë të pavlefshme
