Ambasadori i Izraelit në Serbi, Jahel Vilan, ka thënë se pasi ka kaluar katër vite në Serbi, është i vetëdijshëm se çështja e Kosovës është një nga temat më të rëndësishme për Beogradin dhe se e kupton plotësisht të gjithë ndjeshmërinë për atë çështje.
Ambasadori Vilan, në një intervistë për Tanjug, me rastin e përfundimit të mandatit të tij katërvjeçar në Serbi, ka deklaruar se Izraeli është i ndjeshëm kur bëhet fjalë për konfliktet e tij, të cilat ai beson se mund të zgjidhen vetëm përmes negociatave të drejtpërdrejta dhe jo përmes këshillave të vendeve të tjera.
Këtu ai ka përmendur edhe dialogun Kosovë-Serbi, duke thënë se Izraeli do të donte të shihte një zgjidhje paqeje, por ka shtuar se nuk i takon Izraelit t’i japë këshilla Serbisë se si duhet ta zgjidhë këtë çështje.
“Si çdo vend tjetër, ne do të dëshironim të shihnim një zgjidhje paqësore për çështjen e Kosovës. Por ne nuk jemi këtu për t’i dhënë këshilla Serbisë se si të veprojë për këtë çështje,” ka thënë Vilan.
