Një nga premtimet e shumta të BDI-së në zgjedhjet e kaluara të vitit 2014 ishte gazifikimi i shumë qyteteve, mes tyre edhe në Maqedoninë perëndimore ku bënë pjesë rajoni i Pollogut. Qëllimi i këtij projekti thuhet në platformë është edhe unlja e nivelit të ndotjes së ajrit në Tetovë dhe Gostivar që vjen për shkak të gazrave që lëshon fabrika e Jugohromit dhe ngrohjen me djegje nëpër amvisëri. Madje premtimet e BDI-së kalonin edhe kufijtë administrativ të Maqedonisë dhe shkonin deri në Shqipëri e Kosovë. “Gjithashtu, në periudhë më afatgjatë do të bëhen lidhje me Kosovën dhe Shqipërinë. Për distribucion në nivel të rrjetit, gazifikimi i vendbanimeve, është shpallur ankand për koncesionim për rajonin e Shkupit dhe priten investime rreth 100 milionë euro. Në katër vjeçarin e ardhshëm do të shpallen ankandet edhe për dy rajone tjera: Maqedonia Perëndimore dhe Maqedonia Lindore”, thuhet mes tjerash në platformën e BDI-së për vitin 2014. Por përkundër këtij premtimi, pikërisht pas marjes së mandatit në periudhën 2014, 2015 dhe 2016 rajoni i Pollogut e në veçanti qyteti i Tetovës ngjasoi në dhoma gazi. Niveli i ndotjes në këtë rajoni kaloi katërfishin e limitit të lejuar me mbi 1000 miligram për metër kub të grimcave PM10 dhe grimcave të tjera helmuese. Me afrimin e fushatës parazgjedhore, inspektoriati i ambientit ndaloi punën e fabrikës së Jugohromit për 90 ditë, vendim ky që ngjan shumë me një vendim të mëparshëm që zgjati disa muaj dhe më pas Jugohromi riaktivizoi furrat.
