Bashkimi Demokratik për Integrim (BDI) ka mirëpritur reagimet e menjëhershme pozitive të gjithë botës demokratike për vendimin historik pro Propozimit francez të miratuar nga ana e Kuvendit, e cila vulosi orientimin ideologjik të vendit pa alternativë tjetër, atë të integrimit në Bashkimin Europian.
“Uashingtoni, Brukseli, Berlini, Parisi, Roma, Londra dhe të gjitha kryqytetet e vendeve euroatlantike vlerësuan lartë guximin e forcave progresive që po udhëheqin me vendin. Të paktët që kundërshtojnë, VMRO dhe Levica, mbetën të vetmuar dhe të bashkuar në frymën e forcave regresive proruse”, shtojnë nga BDI.
Ata thanë se shumica dërmuese e qytetarëve të vendit nuk u identifikuan me agjendën ruse, nuk ranë pre e mashtrimeve, provokimeve dhe nuk përkrahën protestat që kishin për qëllim të kthejnë vendin prapa pas gjithë atyre sakrificave dhe arritjeve të përbashkëta dhe t’ia ndërojnë vendit orientimin strategjik.
“Sot është koha e përcaktimit, kush është me Europën dhe kush është kundër, kush është me NATOnë e kush kundër, kush rreshtohet me forcat euroamerikane e kush me me ato proruse. Nuk ka zonë gri, nuk ka të papërcaktuar. BDI konstaton që shumica dërmuese e qytetarëve mbështesin forcat progresive pro euroamerikane dhe ne nuk do të lejojmë devijimin të kursit euroatlantik të vendit”, përfundojnë nga BDI.
