Sipas burimeve ushtarake perëndimore, lideri rus Vladimir Putin besohet se ka qenë i përfshirë personalisht në luftën në Ukrainë dhe se është përfshirë në marrjen e vendimeve operacionale dhe taktike si ato të marra nga një kolonel apo kapiten.
Presidenti i Federatës Ruse po ndihmon në përcaktimin e lëvizjes së forcave ukrainase në Donbas, ku ushtria ruse pësoi një disfatë të përgjakshme kur trupat u përpoqën të kalonin lumin verior në Donetsk në disa raste, shkruan Guardian.
Burimet shtojnë se Putin është ende duke punuar ngushtë me gjeneralin Valery Gerasimov, komandantin e përgjithshëm të forcave të armatosura ruse, gjë që kundërshton pretendimet e autoriteteve ukrainase se gjenerali është i margjinalizuar.
“Ne besojmë se Putini dhe Gerasimov po marrin pjesë në marrjen e vendimeve taktike,” tha një burim ushtarak.
Kujtojmë se ushtria ruse deri më tani nuk ka arritur të bëjë përparim të dukshëm në Donbas, ku prej një muaji po grumbullon pajisje dhe forca ushtarake.
Burimet perëndimore nuk kanë dhënë detaje të tjera, megjithëse nënkuptohet se përfundimi për angazhimin personal të Putinit dhe vendimmarrjen ushtarake bazohet në inteligjencë.
Fillimi i lëkundur i pushtimit të Ukrainës nga Moska, kur rusët nuk arritën suksesin që Moska kishte shpresuar, rezultoi në vendimin për të dërguar gjeneralët më afër frontit. Sipas Forcave të Armatosura të Ukrainës, deri më tani janë vrarë 12 gjeneralë rusë.
Ben Barry, një ish-kapiten në Ushtrinë Britanike dhe një ekspert i luftës tokësore në Institutin Ndërkombëtar për Studime Strategjike, beson se kreu i shtetit nuk duhet të marrë vendime ushtarake.
“Kreu i qeverisë duhet të ketë një punë më të zgjuar sesa të marrë vendime ushtarake. Ata duhet të mendojnë për strategjinë politike në vend që të ngecin në ato aktivitete,” tha ai.
