Ish-kryeministri Sali Berisha ka pritur në zyrën e tij ambasadorin e SHBA-ve në Tiranë, Donald Lu. Takimi zhvillohet në një moment delikat për opozitën e cila prej mbi një muaji ka braktisur jetën parlamentare dhe ka paralizuar reformën më të rëndësishme në 25 vjet demokraci, atë në drejtësi dhe specifikisht ligjin e Vetting-ut i cili është dhe hallka kyçe për zbatimin e mëtejshëm të reformës në tërësi. Njëkohësisht me këtë vendim Partia Demokratike ka bllokuar edhe çeljen e negociatave me BE-në, ku siç u shpreh para pak javësh Federika Mogherini, është kushti i vetëm që BE të hapë dyert për Shqipërinë.
Megjithatë, sa herë ka të tilla kriza, ambasadori Lu drejtohet për te Berisha, sepse e di mirë se është akoma ai që vendos për fatin e Partisë Demokratike dhe rrugën që ajo do ndjekë. Takimi i sotëm i cili zgjati afro një orë nuk është zbardhur akoma nga ambasada amerikane, por ish-kryeministri Berisha ka shpërndarë një deklaratë për mediat ku shkruan pikat, që diskutoi sot me ambasadorin që aq shumë PD e ka anatemuar. Në komunikatë Berisha bën me dije se ka i ka shprehur ambasadorit Lu shqetësimin e Partisë Demokratike për drogën dhe krimin që sipas tij janë kërcënim serioz për vendin.
Por, ajo që të bën përshtypje në gjithë deklaratën e shpërndarë për mediat nga Berisha, është se në asnjë rresht Berisha nuk flet për qeveri teknike. Ndryshe nga Basha, i cili e ka ngritur gjithë retorikën e tij politike mbi qeverinë teknike si të vetmen zgjidhje për të hyrë në zgjedhje, Berisha është shprehur se zgjedhjet do të mbahen, duke mos përmendur as “qeveri teknike” e as “zgjedhjet e lira”, që kanë qenë fjalët kyçe të Bashës çdo ditë në çadër e media.
Kësilloj Berisha sot ka rrëzuar fushatën një mujore të Bashës duke nxjerrë në pah një të vërtetë të thjeshtë se në Partinë Demokratike ka dy linja dhe në fakt kjo është kriza e vetme në gjithë këtë histori me “qeveri teknike” e çadra ironike. Një qëndrim i tillë i Berishës sot ka kthyer me këmbë në tokë edhe ata deputetë brenda Partisë Demokratike që kanë besuar në një moment se Basha po merrte kontrollin e organizatës së tyre politike. Afër mendsh që secili prej atyre që ka shkuar në atë çadër deri sot me pretendimin e “qeverisë teknike” apo me pretekstin e “zgjedhjeve të lira”, qofshin ata gazetarë, figura publike apo “shoqëri civile”, sot kanë marrë një përgjigje troç nga lokomotiva e PD-së. E kur ai e thotë një gjë, zor se ndokush ka guximin të thotë të kundërtën e jo më të veprojë ndryshe.
Qëndrimi i beftë i Berishës sot i ka kthyer edhe demokratët naivë që menduan se Basha po drejton Partinë Demokratike, me këmbë në tokë. Sali Berisha është me të vërtetë një opozitar i ashpër, por e di fort mirë se mos-pjesëmmarja në zgjedhje është vetëvrasje për Partinë Demokratike. Ai e di më mirë se kushdo tjetër aty se mos-pjesëmarrja në zgjedhje i bën dëm vetëm partisë së tij, ndaj sot pas takimit të ambasadorin Lu, i dha një “shuplakë” dhe i hodhi në kosh të gjitha deklaratat e Bashës dhe kërcënimet e tij që rrezikonin ekzistencën e Partisë Demokratike.
Doktori ka ditë që e ka braktisur çadrën dhe shkon aty vetëm për ditë të enjte, ku mban fjalimin e tij që do mbante në Parlament, por i pashqetësuar se kryetari i Kuvendit do t’i thotë që i ka mbaruar koha e fjalës. Ai shkon dhe flet me gjuhën e tij për të karikuar demokratët të cilët sot i kanë më shumë se kurrë sytë nga ai. Sepse edhe ata e dinë se vetëm Berisha mund ta shpëtojë Partinë Demokratike nga shfarosja e cila mund të vijë si pasojë e një vendimi fatal nga Basha për të mos hyrë në zgjedhje nga frika se i humb ato, e bashkë me zgjedhjet dhe karrigen e kryetarit.
Berisha sot qe i qartë në deklaratën e tij. Ai sot i tha “jo” pretendimeve të Bashës dhe i tregoi edhe njëherë opinionit publik se kriza e vetme politike në Shqipëri janë linjat e ndryshme brenda Partisë Demokratike të cilat Basha po i kamuflon si krizë zgjedhjesh./Lexo.al
