Donald Trump ka vlerësuar rolin që Sylvester Stallone ka luajtur në faljen e një prej boksierëve më të mëdhenj të të gjitha kohërave.
Jack Johnson u bë kampioni i parë me ngjyrë në peshën e rëndë në botë kur fitoi titullin në vitin 1908 dhe u bë një nga luftëtarët më të nderuar në historinë e boksit, pavarësisht se u përball me racizmin dhe paragjykimet gjatë epokës së Jim Crow në Shtetet e Bashkuara.
Falja pas vdekjes u dha pasi Johnson u dënua nga një juri krejtësisht raciste për shoqërimin e të dashurës së tij të bardhë nëpër linjat shtetërore për ‘qëllime imorale’ më shumë se 100 vjet më parë.
“Unë besoj se Jack Johnson është një person i denjë”, kishte thënë Trump gjatë një ngjarjeje për shtyp në Zyrën Ovale, ku paraqitej edhe i madhi i boksit britanik Lennox Lewis. “Kështu që unë jam duke ndërmarrë këtë hap shumë të drejtë, besoj, për të korrigjuar një gabim”.
Dhe Trump kishte konfirmuar më parë përmes mediave sociale se Stallone, i cili ishte një tjetër pjesëmarrës në ngjarjen e Zyrës Ovale, kishte qenë një shtytës kryesor për të pastruar emrin e Johnson.
“Sylvester Stallone më thirri me historinë e kampionit të boksit në peshën e rëndë, Jack Johnson”, shkroi ai në Twitter. “Sprovat dhe mundimet e tij ishin të mëdha, jeta e tij komplekse dhe e diskutueshme. Të tjerë e kanë parë këtë gjatë viteve, shumica menduan se do të bëhej, por po, unë po shqyrtoj një falje të plotë”.
Mbesa e madhe e Johnson, Linda Haywood, kishte bërë një fushatë prej kohësh që legjenda e boksit të falej gjithashtu.
“Sigurisht që shpresoj se Presidenti Trump do t’i japë falje xhaxhait tim. Kjo falje është vonuar shumë dhe unë u zhgënjeva shumë kur Presidenti Obama nuk i dha faljen xhaxhait tim”, deklaroi Haywood.
Johnson, i cili vdiq në vitin 1946, mbahet mend si një nga boksierët më të mëdhenj të të gjitha kohërave. /Telegrafi
