Kryetari i Lëvizjes së përtëritjes serbe (SPO) Vuk Draskovic ka porositur në prag të kremtes fetare serbe Vidovdan, të 28 qershorit, se popullit serb i është i domosdoshëm mirëkuptimi dhe miqësia me popullatën shumicë shqiptare në Kosovë, transmeton Gazeta Metro.
“Në Kosovë e kemi mbamendjen historike, në Metohi (Dukagjin) i kemi kishat e manastiret. Kemi obligim që të angazhohemi për mbetjen dhe fuqizimin e popullit serb në atë tokë. Këtë mund ta arrijmë vetëm në mirëkuptim e miqësi me popullin shumicë shqiptar”, ka thënë Draskovic në “porosinë e Vidovdanit”, ka bërë të ditur lideri i SPO-së opozitare, transmetojnë mediet serbe.
Duhet përkujtuar se po në këtë ditë, në vitin 1989, Slobodan Milosevici ka mbajtur tubimin më të madh, në të cili, pasi e kishte rrënuar autonominë e Kosovës, paralajmëron edhe luftat, të cilat u zhvilluan më pas në hapësira e Jugosllavisë./gazetametro
