Ata që flenë për më shumë se një orë në ditë kanë 45% më shumë rrezik që të preken nga diabeti i tipit 2 kanë zbuluar shkencëtarët.
Ndërsa marrja e një sy gjumi për një kohë më të shkurtër nuk ka asnjë efekt në rritjen e rrezikut, thuhet në studimin e prezantuar në takimin e Shoqatës Evropiane për Studimin e Diabetit në Mynih të Gjermanisë.
Ekspertët nga Japonia vëzhguan të dhënat nga 21 studime të ndryshme, ku janë përfshirë më shumë se 300 mijë njerëz, dhe zbuluan lidhjen midis gjumit gjatë ditës dhe diabetit të tipit 2.
Pasi përjashtuan faktorët potencialë, ata zbuluan se fjetja për më shumë se 60 minuta në ditë rrit në mënyrë të konsiderueshme rrezikun për zhvillimin e diabetit të tipit 2.
Ndërsa fjetja për më pak se një orë nuk kishte asnjë ndikim.
“Gjumi gjatë ditës mund të rrisë rrezikun e zhvillimit të diabetit dhe sindromës metabolike”, arritën në përfundim autorët e studimit.
Ndërsa një tjetër studim i bërë publik para disa muajsh tregonte se gjumi i pasdites mund të rrisë rrezikun nga vdekja e parakohshme. Nga studimi që iu bë më shumë se 300 mijë njerëzve, u zbulua se të bësh gjumë për më shumë se 40 minuta në ditë mund të ndikojë në zhvillimin e obezitetit, shtypjes së lartë të gjakut dhe kolesterolit.
