Kuvendi miratoi sot pasdite në mënyrë të përshpejtuar ndryshimet në Kodin Penal, me të cilat ulen ndjeshëm dënimet për format e ndryshme të veprave penale të kryera nga funksionarët shtetërorë, si “keqpërdorimi i detyrës zyrtare” dhe “bashkim kriminal”.
Për ndryshimet, 48 deputetë votuan “pro”, dhe 36 ishin “kundër”. Një deputet abstenoi.
Në shpjegimin e ndryshimeve ligjore, përveç të tjerave, qeveria deklaroi se synimi është harmonizimi i Kodit Penal me dokumentet ndërkombëtare, si dhe se propozimi i ligjit bazohet në të njëjtat parime mbi të cilat Kodi Penal është i bazuar.
Votimit i parapriu debati në të cilin deputetët e opozitës shprehën kritika të ashpra, duke akuzuar qeverinë se ka sjellë këto ndryshime ligjore për të amnistuar ata që shkelin ligjin. Siç theksuan deputetët e VMRO-DPMNE-së, edhe në këtë rast po keqpërdoret flamuri evropian. Por, sipas zëvendësministres së Drejtësisë Viktorija Avramovska – Madiq, e cila iu përgjigj atyre, nga gjithsej 38 nene në ndryshimet dhe plotësimet ligjore, 35 janë me direktiva të BE-së.
