Legjenda angleze, Frank Lampard ka thënë se transformimi i Chelseat nga gara për mbijetesë në sezonin e kaluar në luftë për titull këtë sezon është falë ardhjes së Antonio Contes.
“Të Kaltrit” kishin shumë probleme në sezonin e kaluar, një vit pas triumfit në Premier Ligë, me ç’rast Jose Mourinho ishte shkarkuar për herë të dytë nga klubi, transmeton Koha.net.
Në këtë sezon Chelsea nën menaxhimin e Contes ka arritur 13 fitore radhazi në Premier Ligë, duke barazuar rekordin.
“Nuk e shoh ndonjë ekip të arrijë ata. Chelsea është ekipi më i organizuar. Costa dhe Hazard bëjnë diferencën, duhet të japësh shumë merita edhe trajnerit gjithashtu. Ata ishin në një pozitë shumë të vështirë vjet. Kur isha kthyer unë në kohën e Hiddinkut në dhomën e zhveshjes ishte një atmosferë e tmerrshme, në ligë ishin në vend të 12-të. Njerëzit ishin të lënduar, nuk po luanin mirë dhe mund ta ndienit se nuk ishte në rregull. Ata kishin nevojë të ndryshonin mentalitet. Conte e bëri këtë pa bërë ndonjë ndryshim të madh në aspektin e lojtarëve. Ai bëri disa prurje dhe Kante ishte fantastik, por Conte ishte saktësisht për çka ata kishin nevojë”, shprehet Lampard për Daily Mail.
Ai më tutje flet për rivalët e Chelseat për titull.
“Arsenalin e Manchester Cityn nuk i shoh duke fituar sikur Chelsea. Më pëlqen Liverpooli dhe Jurgen Kloppi, por ata nuk kanë vazhdimësi”, është shprehur ish-mesfushori i Chelseat.
