Moti i ligë dhe shiu i rrëmbyeshëm mbrëmjen e djeshme në Komunën e Studeniçanit nxorri nga shtrati lumin “Markova” siç mund të shihni në krahun e djathtë timin, por fatmirësisht nuk kishte të lënduar dhe deri më tani asnjë viktimë. Ajo që është konstatuar deri më tani ka vetëm dëme materiale nëpër oborre të shtëpive dhe qytetarët u ankuan se reagimet institucionale nuk ishin të shpejta. Nga ana tjetër, Ura në fshatin Batincë, ekspertët konstatojnë se është në rrënje dhe nuk lejohen të kalojnë mjetet e rënda dhe automjetet normale.
Qytetarët e prekur nga përmbytjet në Komunën e Studeniçanit u ankuan se reagimi i autoriteteve ishte i vonuar.
Kryetari i Komunës së Studeniçanit, Azem Sadiku për Klan Macedonia tha se janë në terren për të konstatuar dëmet dhe shtoi se edhe ekipet e ekspertëve janë në mbikëqyrje, posaçërisht edhe tek ura e cila dukshëm ishte në rrënje.
Ndryshe, reshjet e dendura të shiut që goditën Shkupin mbrëmjen e djeshme shkaktuan rritje të nivelit të lumit Markova, duke çuar në daljen e tij nga shtrati në disa zona dhe përmbytje të shumë pronave. Autoritetet lokale në Studeniçan dhe Kisella Vodë intervenuan në terren për të menaxhuar situatën dhe deri më tani janë konstatuar vetëm dëme materiale. /tvklan.mk
