Drejtori i Drejtorisë Komunale të Arsimit në Komunën e Drenasit, Sadik Tahiraj në një mbledhje të jashtëzakonshme me drejtorin e Institucioneve Arsimore në Komunën e Drenasit ka diskutuar për rastin e fundit të Gjykatës së Apelit për rastin Drenica II, ku nga ky vendim i kësaj gjykate është dënuar edhe Kryetari i Komunës, Nexhat Demaku.
“Pas diskutimeve nga të pranishmit, doli si propozim që orën e parë mësimore për ditën e nesërme (27.10.2016) t’i kushtohet luftës së lavdishme të Ushtrisë Çlirimtare të Kosovës, që mesazhi i luftës së drejt për lirinë e vendit ta bartin mësimdhënësit tek nxënësit se UÇK-ja ka bërë luftën çlirimtare për të mbrojtur popullatën e pafajshme civile, luftë kjo e cila është njohur edhe ndërkombëtarisht dhe se ushtarët e UÇK-së kanë qenë dhe do të mbesin të përjetshëm çlirimtarët e vendit tonë”, thuhet në njoftimin për media./Telegrafi/
