Shiu që ka nisur sërish ka vënë në alarm portokalli një pjesë të rajonit të goditur të Valencias, ndërsa 500 trupa shtesë janë përfshirë në kërkimin e personave të zhdukur.
Spanja, e cila shpalli tre ditë zie, numëron të vdekurit e saj, të cilët tashmë arrijnë në 158.
Përmbytjet më vdekjeprurëse në historinë moderne të Spanjës kanë përfshirë rajonin e Valencias, pasi shirat e rrëmbyeshëm goditën rajonin të martën dhe të mërkurën, duke zhytur rrugë dhe qytete në ujërat me baltë dhe duke lënë pas skena kaosi dhe shkatërrimi të patreguar.
Kryeministri spanjoll Pedro Sanchez u bëri thirrje banorëve në zonat e prekura të “qëndrojnë në shtëpitë e tyre” pasi rreziku nuk është larguar. Më shumë se 1,200 punonjës shpëtimi, të ndihmuar nga dronët, u vendosën në misionin e shpëtimit ndërsa shirat vazhduan të kërcënonin shumë pjesë të vendit.
“Për momentin, gjëja më e rëndësishme është të shpëtojmë sa më shumë jetë të jetë e mundur”, tha Sanchez, duke bërë thirrje për solidaritet dhe vigjilencë.
