Pavarësisht se platforma e përbashkët e partive shqiptare u firmos në Tiranë, krerët e lartë të shtetit shqiptar mohojnë të kenë ndërhyrë në punët e brendshme të Maqedonisë. Presidenti i Shqipërisë Bujar Nishani në intervistën për emisionin ‘200’ nw Rtv AlsatM, sqaroi se platforma e përbashkët është investim dhe përgjegjshmëri tërësisht e faktorit shqiptar politik në Maqedoni në interes të të drejtave të shqiptarëve dhe kontribut real për të ardhmen e Maqedonisë. Sipas Nishanit, Shqipëria thjeshtë kujdeset për shqiptarët në Maqedoni njësoj si dhe për shqiptarët në Mal të Zi e Luginë të Preshevës.
Ka qenë një iniciativë e vetë faktorit shqiptar në Maqedoni për të informuar faktorët relevant në Shqipëri. Nuk ka asnjë ndërhyrje, sepse nuk ka asnjë inicim të iniciativave të posaçme për mënyrën se si Shqipëria duhet t’u tregojë shqiptarëve në Maqedoni se si mund të ndërtojnë ata qeverisjen e ardhshme, si duhet të vendosin ata në koalicione, si duhet të vendosin në mënyrën e emërimit të njerëzve që do t’i përfaqësojnë’ –deklaroi Bujar Nishani, President i Shqipërisë.
Sipas Ministrit të Jashtëm të Shqipërisë, Ditmir Bushati, platforma synon bashkëjetesë më të mirë mes maqedonasve, shqiptareve por edhe minoriteteve të tjera në Maqedoni. Madje ajo ofron hapësirë për më shumë liri, barazi dhe demokraci… koncepte këto të lidhura me sigurinë, fqinjësinë e mirë dhe perspektivën euro-atlantike. Platforma, sipas Bushatit, ka për bazë Marrëveshjen e Ohrit, për respektimin e së cilës nuk mund të negociohet.
‘Shteti shqiptar nuk është përfshirë në çështjet e brendshme të një vendi mik dhe fqinj, siç është Maqedonia. Shteti shqiptar, qeveria shqiptare ka zbatuar një detyrim kushtetues që ka të bëjë me mbrojtjen dhe avancimin e të drejtave të shqiptarëve, pavarësisht se ku ata jetojnë’ – tha Ditmir Bushati, Ministër i Punëve të Jashtme në Shqipëri
Megjithatë të kundërtën e pretendojnë politikanët maqedonas. Ministri i Jashtëm i Maqedonisë Nikolla Popovski ditë më parë kritikoi ashpër politikanët në Tiranë se ndërhyjnë në punët e Maqedonisë me qëllim të përfitimit të pikëve politike. Poposki porositi liderët në Tiranë që përpara përpjekjeve për të demonstruar lidership global, të shikojnë mirë oborrin e tyre.
