Tre të burgosur shqiptarë kanë mundur të arratisen nga burgu në Romë duke zbritur me çarçafë. Ngjarja ka ndodhur mbrëmjen e djeshme në burgun e Rebibbia-s në Romë.
“Corriere della Sera” shkruan se të burgosurit shqiptarë mund të kenë përfituar nga kaosi i krijuar pas tërmeteve të djeshme në Itali, duke qenë se në burg ishin sjellë edhe disa të dënuar nga burgu i Camerinos, zonë që u prek nga lëkundjet.
Mësohet se mungesa e tyre është vërejtur mëngjesin e ditës së sotme, rreth orës 06:00-06:30. Ata ishin vendosur në departamentin G9 të burgut, ku qëndronin të dënuarit për krime “parandaluese”, persona të akuzuar për dhunë seksuale, ish-pjesëtarë të forcave të rendit për shkelje të ndryshme, të cilët mbaheshin të ndarë nga njëri-tjetri. /Blitz.
