Pasi u informua për punën e bërë pas tërmetit nga Qendra e Koordinimit pranë Agjencisë së Menaxhimit të Fatkeqësive dhe Emergjencave (AFAD) Presidenti Erdoan kaloi në nënprefekturën Bajrakllë (Bayraklı), zona më e goditur nga tërmeti, ku hyri në zonën e një pallati të rrënuar. Nga AFAD bëjnë të ditur se numri i jetëve të humbura është rritur në 51, ndërsa 896 të tjerë janë plagosur, nga të cilët 226 vazhdojnë të marrin trajtim mjekësor në spitale.
Presidenti Erdoan gjithashtu tha se 24 milionë lira turke (rreth 2,9 milionë dollarë) në formën e grantit dhe ndihma të tjera janë dërguar deri më tani në zonën e prekur nga tërmeti, duke shtuar se më shumë ndihma do të sigurohen sipas nevojës.
Ai theksoi se 35 stacione lëvizëse janë dërguar në rajon, ndërsa 25 janë instaluar tashmë, duke shtuar se pasi të hiqen të gjitha rrënojat, do të fillojë puna për ndërtimin e shtëpive të qytetarëve që kanë mbetur pa kulm. Erdoan gjithashtu tha se Ministria e Arsimit Kombëtar do të merrte një vendim lidhur me pezullimin apo jo të mësimit në këtë zonë.
Presidenti turk gjithashtu tha se konviktet janë në vënë në dispozicion për të prekurit nga tërmeti, nëse ata kanë dëshirë të qëndrojnë aty, duke shtuar se pas katastrofës, 88 vende kanë përcjellë mesazhe solidarizimi me Turqinë. Tërmeti me madhësi 6,6 ballë sipas shkallës Rihter ishte regjistruar të premten në orën 14.51 me kohën lokale në detin Egje, 17 km larg brigjeve të qytezës Seferihisar të Izmirit dhe epiqendra e tërmetit kishte qenë në thellësinë 16,54 km.
