Presidenti i Bjellorusisë Aleksandër Lukashenko tha se Ukraina u përpoq të sulmonte objektet ushtarake në territorin bjellorus tre ditë më parë, por se ata kapën të gjitha raketat, raporton agjencia shtetërore e lajmeve Belta.
Lukashenko, i cili nuk dha prova për pretendimin, tha se Bjellorusia nuk dëshiron luftë me Ukrainën, por se do të luftojë nëse territori i saj sulmohet. Ushtria ukrainase nuk e komentoi menjëherë incidentin.
“Ata po na provokojnë. Më duhet t’ju them se tre ditë më parë, ndoshta një ditë më shumë, u tentua një sulm ndaj objekteve ushtarake në territorin e Bjellorusisë nga territori i Ukrainës”, njoftoi agjencia Belta në deklaratën e Lukashenkos.
Por, falë Zotit, sistemet kundërajrore Pancir arritën të kapnin të gjitha raketat e lëshuara nga forcat e armatosura ukrainase.
Lukashenko tha se njësitë bjelloruse nuk po marrin pjesë në atë që Moska e quan një “operacion special ushtarak” në Ukrainë.
Bjellorusia është një aleat i ngushtë i Rusisë dhe lejoi Moskën të përdorë territorin e saj për të dërguar trupa në Ukrainë më 24 shkurt.
