Ministrja e Arsimit, Vesna Janevska shprehet e kënaqur që propozim koncepti për reforma në arsimin gjimnazor bëri bujë gjatë ditëve që ishte në debat publik. Pavarësisht që sot ky debat duhet të mbyllet, Janevska nuk e përjashton mundësinë e vazhdimit të tij duke marrë parasysh reagimet e vazhdueshme të profesorëve, kryesisht nga Fakulteti Filozofik. Këta të fundit vlerësojnë se koncepti zvogëlon përmbajtjen e disa lëndëve të shkencave shoqërore në arsimin e mesëm, përkatësisht në gjimnaze.
“Sigurisht që mund të vazhdohet, sigurisht që ne i marrim shumë seriozisht të gjitha deklaratat e bëra nga të gjitha fakultetet, edhe pse flasim kryesisht për Fakultetin Filozofik. E kam thënë një herë që ky është një projekt-koncept dhe se mund të pësojë ndryshime. Ne po vazhdojmë, deri tani kjo është bërë në mënyrë elektronike, dixhitale, do të lëvizim pak në terren dhe sigurisht do të vazhdojmë të punojmë për përmirësimin e saj. Mund të tingëllojë kontradiktore, por jam vërtet shumë e kënaqur që koncepti i ri ka ndezur diskutime, biseda dhe sugjerime kaq të nxehta”, deklaroi Vesna Janevska, ministre e Arsimit.
Ministres së Arsimit, letër të hapur sot i kanë dërguar rreth 30 mësimdhënës të shkollave të mesme të lëndëve Sociologji dhe Arsim Qytetar. Ata thonë se janë dëshmitarë të një sërë turbulencash në arsim që cenuan themelet e arsimit fillor. Ndërkohë, Koncepti i ri i propozuar për reformimin e arsimit të mesëm, ku sociologjia dhe shkencat sociale janë në hije, çon në rënien e cilësisë së arsimit të mesëm.
“Zhgënjimi shtohet edhe më shumë nga fakti se krijuesit e kësaj reforme, të cilët fshihen nga publiku, mbeten të panjohur për publikun dhe kjo ngre dyshime se ky është edhe një herë një proces reformash i përgatitur paraprakisht dhe ju është servuar, përmes infiltrimit të strukturave të caktuara që kanë interesa të caktuara personale dhe ky koncept rrënues i “reformimit të arsimit të mesëm” ua paraqesin si kulmin e mendjes njerëzore”, thuhet në letrën e hapur.
Sipas MASH-it koncepti për reformat në arsimin e mesëm është përgatitur me synimin për të siguruar një sistem arsimor modern, gjithëpërfshirës dhe konkurrues. Dokumenti i propozuar ofron qasje moderne që synojnë përvetësimin e aftësive praktike, zhvillimin e të menduarit kritik, integrimin e teknologjive dixhitale dhe përafrimin me standardet ndërkombëtare arsimore. Gjithashtu, nga MASH thonë se kërkimet tregojnë se si mësuesit ashtu edhe nxënësit e njohin nevojën për ndryshim, veçanërisht në drejtim të modernizimit të kurrikulave, ofrimit të mundësive për zgjedhjen e lëndëve, prezantimit të metodave moderne të mësimit dhe vlerësimit dhe përmirësimit të aftësive të rëndësishme për shekullin e 21-të. /Alsat.mk
