SHBA-ja dhe Ukraina janë afër finalizimit të një marrëveshje që do t’i jepte SHBA-së të drejta të mineraleve të çmuara, një lëvizje që administrata e presidentit Donald Trump e ka ndjekur si kompensim për ndihmën ushtarake për të ndihmuar Ukrainën t’i rezistojë pushtimit të Rusisë, transmeton Anadolu.
Duke cituar burime të njohura me negociatat, ‘Wall Street Journal’ raportoi se një marrëveshje mund të finalizohet sot, megjithëse negociatat janë ende në vazhdim. Kushtet specifike të marrëveshjes mbeten të paqarta.
Fillimisht, Ukraina refuzoi të nënshkruajë marrëveshjen në fillim të kësaj jave, duke çuar në tensione midis presidentit Trump dhe presidentit ukrainas, Volodymyr Zelenskyy, si dhe duke ngritur shqetësime për një përçarje të mundshme midis Washingtonit dhe Kievit.
Dje, Zelenskyy në një video-fjalim sinjalizoi përparim, duke theksuar se negociatorët amerikanë dhe ukrainasë po punojnë për një projekt-marrëveshje.
“Kjo është një marrëveshje që mund të forcojë marrëdhëniet tona dhe çelësi është të përpunohen detajet për të siguruar efektivitetin e saj. Unë me padurim pres rezultatin, një rezultat të drejtë”, tha Zelenskyy.
Sekretari amerikan i Thesarit, Scott Bessent, javën e kaluar i paraqiti presidentit Zelenskyy një propozim gjatë një vizite në Kiev. Megjithatë, Ukraina nuk pranoi të nënshkruajë në atë kohë, duke përmendur nevojën për rishqyrtim të mëtejshëm dhe një kërkesë për garanci të sigurisë.
Zyrtarët ukrainasë theksuan se kishin vetëm disa orë për të shqyrtuar propozimin para se të paraqitej zyrtarisht.
“Mendoj se ata e duan atë. Ata ndihen mirë për këtë”, u tha presidenti Trump gazetarëve në Zyrën Ovale dje, kur u pyet për një marrëveshje të mundshme të të drejtave minerale me Ukrainën.
Refuzimi fillestar i presidentit ukrainas për propozimin e sekretarit amerikan çoi në përshkallëzimin e tensioneve, me Trumpin që e quajti Zelenskyyn një “diktator” pasi udhëheqësi ukrainas sugjeroi se Trump ishte i ndikuar nga dezinformatat ruse.
Të enjten, gjenerallejtënanti në pension, Keith Kellogg, i dërguari i presidentit amerikan për Ukrainën dhe Rusinë, u takua me presidentin Zelenskyy në Kiev, takim që presidenti ukrainas më vonë e përshkroi si një takim që “rikthen shpresën”. Zelenskyy tha se ai udhëzoi ekipin e tij që të punojë “me shpejtësi dhe me shumë arsye” mbi negociatat.
Sipas një burimi pranë qeverisë ukraianse, Kellogg luajti një rol kyç në finalizimin e kushteve të marrëveshjes duke ndërtuar besimin me Zelenskyyn dhe zyrtarë të tjerë gjatë vizitës së tij treditore në Kiev.
Mosmarrëveshja ngriti shqetësime mes aleatëve të SHBA-së se Trump mund të tërheq mbështetjen nga Ukraina, e cila ka qenë e varur nga ndihma ushtarake dhe financiare amerikane për tre vite në mbrojtjen kundër Rusisë.
Trump po kërkon një fund të shpejtë të luftës midis Rusisë dhe Ukrainës.
Të martën, zyrtarë të lartë amerikanë dhe rusë u takuan në Riad të Arabisë Saudite dhe ranë dakord të formojnë ekipe për të negociuar një zgjidhje.
Megjithatë, Zelenskyy shprehu zhgënjim për përjashtimin e vendit të tij nga bisedimet, duke deklaruar se Ukraina nuk do të pranojë asnjë marrëveshje që nuk është e përfshirë ajo në negociata.
