Kryetari i Aleancës për Shqiptarët në VLEN, Arben Taravari ka dalë me një deklaratë ku thotë se nëse nuk shkojnë me VLEN-in në zgjedhje lokale, dalin vetë, me çka ka përjashtuar mundësinë e koalicionit me BDI-në.
“Nëse nuk dalim me VLEN-in, opsionin e dytë e kemi të dalim vetë në zgjedhje dhe ky është opsioni i dytë, por ta shohim edhe disponimin mes anëtarësive. Për mua është shumë me rëndësi zëri i anëtarësisë dhe zëri i qytetarëve”, tha Taravari pasi foli për dallimet në VLEN dhe u pyet se a pritet një koalicion me BDI-në.
Ai ka deklaruar se për momentin ata nuk do ta braktisin Qeverinë. Sipas tij, grupet punuese mes deputetëve janë në negociata dhe shpreson se do të gjejnë gjuhë të përbashkët. “Nëse nuk gjejnë atëherë shohim si e bëjmë”, tha Taravari.
Ministri Taravari tha se sonte deputetët duhet t’i raportojnë për bisedimet që janë bërë. “Do mundohemi t’i tejkalojmë të gjitha mosmarrëveshjet e vogla, nuk janë diçka shumë të mëdha”, tha mes tjerash Taravari.
Për dallimet, Taravari tha se kryesisht ndërlidhet me listat e këshilltarëve. Sipas tij, tre partitë në VLEN duan të dalin me një listë.
